يا شعبنا.. جيشك واحد
ياجيشنا.. شعبك واحد
يا الاسمك ورسمك.. واحد
والوطن الشامخ واحد
واحد.. اسمو السودان
****
الجيش ياشعب.. أمانك
بيساهر ويشقى.. عشانك
في درب الحق.. ميزانك
مافيه.. العاق.. الخانك
بالدم.. الطاهر.. صانك
ومكانك.. ياهو مكانك
خاتيك في اعلى مكان
والجيش جيش السودان
****
ده الشعب ياجيشنا الصامد
العارف قيمة جيشو
الشعب الممكن يفدي
سودانو بلقمة عيشو
الشعب الفاهم وعارف
عز الاوطان.. إنسان
ده الشعب الما بيساوم
في الوطن العالى الشان
شعب السودان الاخضر
في اي مكان وزمان
****
تاريخنا العامر.. بشهد
والعالم كلو.. بيشهد
بعرض الدنيا وطولا
عزة.. وايمان.. وبطوله
والقمم العالية.. نطولا
والجيش الراسم المشهد
دايما في الخطوة موحد
من اجلك ياسودان
****
الجيش ماشغلو سياسة
ولا همو نفوذ ورئاسة
وماممكن يصبح يوم
ميدان اطماع الساسة
ويقيف ضد البيقيف
ضد شرف الدولة وناسا
الجيش قوات الشعب
الشعب.. العانى وقاسا
من ويل طلاب السلطة
الهمهم السلطان
ياريتم يعرفو.. انو
الجيش جيش السودان
حارس امجادو وعزو
ومابقبل اي رهان
****
الجيش بالوحدة.. موسّم
مابرضى الوطن.. يتقسّم
للخير والحب.. يتوسّم
للخطوة الصاح.. يترسّم
شان كل الناس.. تتنسم
عطر الامجاد لازال
بيفوح في كل مكان
ونعيش في حب وأمان
من اجلك ياسودان