ازيكم..
مااظن في شيء في الدنيا دي ممتع زي البشر..
انا غايتو دي هوايتي الاولي..
اهم شيء تبدا بروحك..
عاين ليها من بره واجرد حسابك معاها من فترة لفترة
شوف انت بتتصرف كيف... قيم ردود افعالك ...
اول ما تزهج منها وما في جديد
ارجع عاين لشريكك تفاعله وطريقتو
اتفرج علي الحولك وتصرفاتهم وطريقتهم .. وبعاينوا للامور كيف..
تتدبر في ملكوت الكون لما يكون عندك عيال.. وتشوفهم هم ببكبروا قدام عينك
كلامهم
تفكيرهم
اختلاف شخصياتهم بالرغم من انهم من نفس الام والاب ومربيين زي بعض... بس زي اصابع اليد كلو واحد بشكلو وبقدرتو و(بفنو)..
زملاء الشغل ... واصحاب المصلحة ..
ما دايما من تابع الناس مات هما
من تابع الناس زاد (فنا)
لانو المتابعة زاتها خشم بيوت
المتابعة بغرض التعلم فعلا مفيدة
بتعلمك الحكمة وبتعلمك ادارة فن الاختلاف.. وبتخلي توقعك من القدامك مناسب.. ما بتنصدم شديد ومابتفرح شديد ومابتزعل شديد
غايتو بتتاكد انو هذا الانسان هو معجزة الله في الارض..
واحدة من الحاجات البتعلمك قراية الناس حتي لو ما بتعرفهم (السواقة)..
الاخوة الرجال في الكوكب مطلعين (دعاية) انو النسوان ما بعرفن يسوقن زي قصة انو النسوان (حطب النار) ديك.. مع انو النسوان ديل يوم واحد لا ساقن جيوش... و لا اهلكن حرث ولا ضرع ولا نسل ولا حتي سمعنا انو خسفوا بيهن ارض ولافتحوا بيهن بحر بلعهن..
المهم السواقة حقت العربات دي من نفس مدرسة حطب النار .. لانو سواقة العربية بامان مامن الحاجات المحتاجة ذكاء ولا امكانية عقلية محددة.. مره بتكلم مع واحدة معانا في الشغل هي
occupational therapist
وهم بشتغلوا في اعادة التاهيل للمرضي النفسيين دايما وهي منطقة التخصص حقي.. بتكلم معاها وهي بتحاول تساعد كم زول انهم يعملوا امتحانات رخصة القيادة.. فالقصة انو اي زول حتي لو بمعدل ذكاء اقل من
49
البتفصل بين الناس العندهم احتباج خاص او ماعندهم ممكن يمتحنوا وينجحوا ويسوقوا ومصنفة مع المهارات المامحتاجة شيء كتير
فقصة انو عالميا ومحليا تشوف ناس مصرين انهم يحتفظوا (بشرف معرفة اصول القيادة) دا مضحك شوية.
المهم ...
السواقة عبارة عن (شخصيتك)... مامهارة ولا شيء
السواقة واحدة من الحاجات البتوريك سلوك القدامك وشخصيتو او اذا راكب مع شخص وهو بسوق.. طريقة السواقة والتصرف مع الحولك في الطريق بتكشف عن جانب كبير من شخصيات الناس..
بتشوف المتردد والبلقي صعوبة شديدة في اتخاذ القرار.. يكون الشارع حقو ولسه بكون بمد في بوز عربية حبة حبة والكل واقف يعاين ليهو وهو لسه بتلفت
بالمقابل طوالي البتعامل مع (المتردد المتلفت) دا بزهج وحراق روح.. وطوالي يخش الشارع حتي لو ماحقو.. صبر مافي كلو كلو تشوفو دخل الشارع ووشو كلو يرقص من الزعل.
وفي الثقيل البصر انو يعكنن علي الحوله ويجي يخت ليك وش عربيتو في ضهرية عربيتك ويصر يمشي وراك كدة بس ويديك احساس انو مستعجل وفي رسالة كدة حايمة في الجو (امشي امشي امشي بمش ختك) في السودان بقول ليك فلان (قرص) لفلان وعادة بعملوها الرجال للنسوان جزء من عباطة الثقافة المحلية وكدة
وطوالي قصاد دا في العربية التانية.. الثقيل بحاول يغلس عليك فيها دي.. في زول بعمل فيها (اضان الحامل طرشاء) ويحلف ما يشتغل بيك.. باااارد واعصابو حديد.. قدر ماتخت ليهو وش عربيتك دا هو بمشي براحة زيادة !!
او كمان يكون زول خواف جدا والنوع البترعب من الناس البتلصقوا ديل فبقوم جاري منك..
وفي كمان الحذر الاكتر من اللازم.. يتلفت ويعاين بالمرايات ونفسو قايم.. يفتش لكميرات السرعة..
في المعتدل المحترم البمشي بكل ادب ووبساطة بمرر القدامو اذا استدعت الحالة المرورية وبرفع يدو يحيك لو خليتو خش قدامك او كمان ابتسم ليك في المراية..
كمان في المجامل شديد.. والداير يسعد البشرية يمرر ليك الناس كلها ويقيف لزول عشان يعبر الشارع حتي في الهاي وي
ويتبسم براو.. كان عليهو ينزل يسلم عليكم كلكم ويديكم لبعات في ضهركم من المحبة..
في الحقار البصر يخش قدامك حتي ما بستاذنك وتسمع صوت موتور عربيتو
ورورور.. ورورور.. زئير شديد.. يعني اها بتعمل شنو
ديل بلاقوهم ناس سريعي التاثر والاستفزاز
تلقاهم ساكين الزول دا وجارين وراه وتسمع حتي النبذ ومرات الاشارات البذيئة باليدين والبوري والعجاجة تقوم
وبلاقوهم ناس زيي كدة بخليهم طوالي يفرحوا شوية كدة لانتصار ماعندو معني ويخش الشارع ويعمل الدايرو وربنا يسهل عليه
في المتهور والمستعجل.. الماعندو قيمة لا لروحه ولا السايقين حوله..
الاكتر ظرافة وفي اي حتة في الدنيا
انو العربية السمحة زي الناس الشكلها سمح
عندهم احترام وتقدير من (النظرة الاولي)
والناس بفسحوا ليهم الشارع.. وتلاقي العربات الجديدة والغالية كدة الناس بتغفر ذنب اصحابها حتي كان سواقتهم فيها جزء من شخصياتهم المكلكعة دي
طوالي المستعمل الشارع بكون بعاين (للحديد النضيف) دا من غير ما يشتغل بطريقتك في السواقة.
وفي برضو البكون داير يثبت انو العندهم عربات سمحات ديل (فارات) ساي وانو الله بدي الحلق للما عندو اضان
وديل عادة بكونو في مجتمعات زي مجتمعاتنا كدة وخاصة اذا كانت السايقة الفارهة دي بت
يبدا يضايقها ويراقبها ويشنف سواقتها ويلولو خشمو وعبارات اي اي كسريها وخلي بابا يستري ليك واحدة تانية
والعكس تماما كان سايق ليك (علبة صلصة) مطفجة بكون في ناس كتار دايرين يحقروا بيك ويلاوزوا ليك ويشيلوا من ثفتك في نفسك..
المهم السواقة دي ماعندها علاقة براجل ولا بمره
بالاضافة لنمط الشخصيات الباثر فيها
عشان تكون سواق شديد وكويس
الا تكون زول كويس اولا.
*تماضر الحسن*